MPUMALANGA. – ’n Tweejarige seuntjie, Sibusiso Mnisi, het Dinsdag tragies verdrink nadat hy in ’n stroom naby sy huis meegesleur is.
Luidens ‘n verklaring van polisiewoordvoerder, lt.kol. Jabu Ndubane, het Thapiseng Mnisi, die kleuter se ma, gesê hulle woon naby ‘n stroom. Die kleuter was volgens haar in die huis aan die slaap toe sy dit verlaat het om oor die stroom te gaan. Sonder dat sy dit geweet het, het hy haar gevolg en probeer om die stroom op sy eie oor te steek. Die sterk stroom het hom egter meegesleur en hy het verdrink.
Nooddienste is ontbied en het die kind op die toneel dood verklaar. Die polisie het ’n geregtelike doodsondersoek geopen om die omstandighede rondom die voorval verder te ondersoek.
