Springbokkaptein Siya Kolisi sê die span weet presies wat nodig is om Vrydagaand in Parys die oorhand te kry wanneer die Springbokke teen Frankryk in die Nations Championship op die Stade de France kragte meet.
Kolisi en die Springbokke se hulpafrigter, Mzwandile Stick, het Donderdag tydens hul laaste mediakonferensie voor die toets groot respek vir die Franse span uitgespreek. Hulle verwag ’n uiters fisieke kragmeting, veral met die verrassende insluiting van Antoine Dupont op losskakel.
Kolisi oor Frankryk: Dupont op losskakel
Dupont, wat gewoonlik op skrumskakel uitdraf, is ná ’n reeks beserings in die Franse span na die nommer 10-posisie geskuif. Hy sal saam met Maxime Lucu die skakelpaar vorm.
Volgens Kolisi verander dié skuif egter niks aan die Springbokke se verdedigingsplan nie.
“Ons stelsel verander nie na gelang van teen wie ons speel nie. Ons het gekyk hoe hy op losskakel speel en ons het niks spesiaals vir hom voorberei bloot omdat hy die nommer 10-trui dra nie,” het Kolisi gesê.
Stick het gewaarsku dat Dupont en Lucu waarskynlik gereeld tydens die wedstryd van posisie sal verwissel.
Hy meen Frankryk sal Dupont die vryheid gee om tussen skrumskakel en losskakel te beweeg, terwyl Lucu se taktiese skopwerk en wedstrydbestuur ’n verdere bedreiging inhou.
“As ons daardie skakelpaar tyd en ruimte met die bal gee, kan hulle ons straf. Ons belangrikste fokus is om seker te maak dit gebeur nie,” het Stick gesê.
Die Franse agterlyn beskik ook oor gevaarlike aanvallers soos Louis Bielle-Biarrey, wat volgens Stick die Springbokke se verdediging deeglik kan toets.
Stryd tussen die voorspelers
Stick glo die stryd tussen die twee spanne se voorspelers sal uiteindelik die grondslag vir die wedstryd lê.
“Albei pakke wil momentum opbou en oorheers. Dit sal die platform vir die agterspelers skep. As ons vinnige bal kry, het ons ook die spelers om Frankryk te straf.”
Wêreldbeker-oorwinning is geskiedenis
Kolisi het intussen enige sprake verwerp dat Suid-Afrika se dramatiese oorwinning met een punt oor Frankryk in die kwarteindronde van die Rugbywêreldbeker in 2023 aan die Springbokke ’n sielkundige voordeel gee.
“Wat destyds gebeur het, is geskiedenis. Ons het die groep verander en ook sekere dinge aan ons speelstyl aangepas. Dit is ’n nuwe wedstryd en ’n nuwe geleentheid,” het hy gesê.
Hy erken egter dat die Springbokke bewus is van hoe gemotiveerd die Franse sal wees ná daardie nederlaag.
Kolisi sien ook uit na die besondere atmosfeer op die Stade de France, waar die Franse ondersteuners bekend is vir hul passie.
“Die atmosfeer is ongelooflik, met die volksliedere en die hele opset. Maar sodra jy op die veld stap, verdwyn dit alles. Dan is dit net jy en die speler oorkant jou.”
Volgens Kolisi sal die fisieke stryd, vaste fasette en vermoë om oor die voordeellyn te kom deurslaggewend wees.
“Ons weet hoe trots die Franse op hul vaste fasette en fisieke spel is, maar ons is net so trots daarop. Ons weet presies wat van ons verwag word en wat ons standaarde is.”
Die wedstryd tussen Suid-Afrika en Frankryk skop Vrydagaand om 22:10 Suid-Afrikaanse tyd af en word regstreeks op SuperSport uitgesaai.
Lees ook: Erasmus hou by beproefde Bokke vir kragmeting teen Frankryk
Bron: SA Rugby, 12 November 2026.
