ITALIË. – Die organiseerders van die Milaan Cortina Olimpiese Spele het bevestig dat gratis kondome in die Olimpiese dorpie tydelik opgeraak het nadat die vraag hoër as verwag was.
Volgens die Italiaanse nuusblad La Stampa het die voorraad binne net drie dae uitgeput geraak. ’n Anonieme Olimpiese atleet het aan die publikasie gesê die gratis kondome wat aan deelnemers beskikbaar gestel is, was vinnig op.
Die plaaslike reëlingskomitee het Sondag in ’n verklaring bevestig dat die voorrade “tydelik uitgeput” was weens groter as verwagte aanvraag. “Bykomende voorraad word tans afgelewer en sal tussen vandag en Maandag na al die Olimpiese dorpe versprei word,” het die komitee gesê.
Die komitee wou nie bevestig hoeveel kondome vir die Spele aangekoop is nie. Volgens La Stampa was dit minder as 10 000 vir die sowat 2 871 atlete – aansienlik minder as die 300 000 wat by die Paryse 2024 Olimpiese Spele beskikbaar gestel is. Daar was ongeveer 10 500 atlete by die Paryse Spele.
Die Olimpiese skiër Mialitiana Clerc, wat ook vier jaar gelede vir Madagaskar aan die Winterspele in China deelgeneem het, het gesê sy is nie verbaas oor die situasie nie. Sy het tydens ’n nuuskonferensie van die Internasionale Olimpiese Komitee (IOK) gesê soortgelyke tekorte is reeds by vorige Spele beleef.
“Ek het dit reeds in Beijing gesien,” het sy gesê, met verwysing na die Beijing 2022 Winterspele. “Daar was bokse vol kondome by die ingang van elke gebou waar ons gebly het. Elke dag was alles weg.”
Volgens Clerc neem sommige atlete ook kondome om dit as aandenkings vir vriende tuis te gaan gee.
Die organiseerders het intussen verseker dat daar geen verdere tekorte tot met die sluitingseremonie op 22 Februarie verwag word nie, aangesien voorrade voortdurend aangevul sal word.
Bronne: La Stampa, People, WDBJ7
