VSA. – Lillian Droniak, die 96-jarige sosialemedia-sensasie, beter bekend as “Grandma Droniak” van Connecticut, beweer haar aftreeoord het haar gewaarsku dat sy uitgesit kan word, na bewering as gevolg van luidrugtige partytjies en alkohol wat aan ander inwoners bedien word.
Droniak, wat sowat vier miljoen volgelinge op Instagram en nog miljoene op TikTok het, het die afgelope week wêreldwyd aandag getrek nadat sy ‘n video gedeel het waarin sy ‘n waarskuwingsbrief wys wat volgens haar deur die bestuur van die aftreeoord uitgereik is. Volgens die brief is sy aangesê om op te hou om sogenaamde “rowdy parties” aan te bied. Die bestuur beweer ook sy het alkohol aan ander inwoners bedien, wat glo teen die oord se reëls is. Daar word verder gewaarsku dat verdere oortredings daartoe kan lei dat sy uit die aftreeoord geskop word.
Droniak het die video met haar kenmerkende humor gedeel en haar volgelinge gevra of hulle dink sy moet ophou partytjie hou. Die plasing het vinnig miljoene kyke en duisende reaksies gelok, met baie mense wat haar verdedig en meen sy behoort haar lewe op haar eie manier te kan geniet.
Dit is egter nie duidelik of die waarskuwingsbrief eg is of deel van Droniak se bekende komiese inhoud op sosiale media nie. Sy is bekend daarvoor dat sy humoristiese video’s plaas waarin sy dikwels oordrewe of denkbeeldige situasies uitbeeld. Die bestuur van die aftreeoord het nie die bewerings in die openbaar bevestig of kommentaar daarop gelewer nie.
