WES-KAAP. – ’n Voormalige polisiekaptein (45), wat vir meer as 20 jaar lank die gereg ontvlug het, is Donderdag by sy Sunningdale-huis in hegtenis geneem. Die inhegtenisneming is gemaak nadat lede van die Milnerton-polisie deurslaggewende inligting ondersoek het.
Die verdagte se naam is aan Nuusflits bekend, maar word teruggehou totdat dit deur die nasionale vervolgingsgesag bekend gemaak word.
Volgens polisiewoordvoerder, kapt. Frederick van Wyk, is die voortvlugtige, wat sedert 2002 gesoek word, in ‘n dramatiese wending ná twee dekades opgespoor. Om net te bewys dat niemand ooit weet wie hulle bure is en wat hulle wegsteek nie, het die gesoekte verdagte rustig en uit die oog in Table View, ver van Mpumalanga, gewoon. Die rustigheid het egter tot ‘n einde gekom toe die inligting ontvang en ‘n operasie geloods is.
Die aanklagte waarvoor die voormalige offisier gesoek was, sluit onder meer beweerde verkragting en seksuele aanranding in. Lasbriewe vir sy inhegtenisneming is oor jare in Nelspruit, Secunda en Middelburg uitgereik. Die voormalige voortvlugtende se dae van vryheid is uiteindelik getel, aangesien hy vir nege beweerde sake verantwoording moet doen.
Die verdagte het Vrydag in die Kaapstad-streekhof voorgekom.
Nuusflits het kommentaar van die NVG gevra.
