WES-KAAP. – ‘n Vluginstrukteur en ‘n privaatvlieënier het vanoggend aan boord van ‘n Sling 2, registrasie ZF-FWF, gesterf toe hulle ligte vliegtuig in Van Schoorsdrifstraat by die Morningstar-vliegveld in Kaapstad neergestort het.
Luiden ‘n verklaring deur Sisa Majola, woordvoerder van die burgerlugvaartowerheid, het die afdeling vir ongeluk- en insidentondersoeke (AIID) ’n ondersoek van stapel gestuur. Die ligte vliegtuig het om onbekende redes neergestort nadat dit net ná 11:00 opgestyg het. Albei insittendes is op die toneel dood verklaar. Die vliegtuig is tydens die impak verwoes.
AIID-spanne is na die terrein ontbied om bewysstukke in te samel en die omstandighede van die ongeluk vas te stel. ’n Voorlopige verslag word oor 30 dae op die webtuiste van die Suid-Afrikaanse Burgerlugvaartowerheid gepubliseer.
Die AIID het sy medelye teenoor die families en naasbestaandes van die oorledenes uitgespreek.
