WES-KAAP. – ’n Jong ma van die Goederverwagting-plaas buite die Paarl moes glo tydens ‘n plaasaanval ’n indringer, wat met ‘n panga gewapen was, afweer terwyl haar twee jong kinders in die huis was. Die verdagte het na bewering probeer om haar babadogter (1) te ontvoer. Die baba se klere en doek is glo uitgetrek en sy is as ’n “skild” gebruik terwyl die verdagte in die huis was.
Albert Theron vertel Vrydag in ‘n sosialemediaplasing op Facebook die verdagte was sowat 20 minute lank in die woning by sy dogter en haar kinders, terwyl sy makkers glo buite gewag het. Die ma kon uiteindelik daarin slaag om die verdagte af te weer. Volgens Theron kon die situasie noodlottig geëindig het, as sy dogter nie kalm gebly en vinnig opgetree het nie. Daar word voorts beweer dat die polisie en veiligheidsdienste min ondersteuning gebied het.
Nuusflits het polisiekommentaar oor die plaasaanval gevra.
