KWAZULU-NATAL. – ’n Man (24) is Maandag in verband met ’n beweerde aanval op sy vriendin (31) in Umlazi in hegtenis geneem. Tydens beweerde huishoudelike konflik het hy ook glo haar motor beskadig en sy het op haar beurt glo sy motor uitgebrand.
Luidens ‘n verklaring van polisiewoordvoerder, kol. Robert Netshiunda, het die man die vrou na sy woning ontbied om haar besittings te gaan haal. Daar het hy glo die vrou met sy hande en ’n pyp aangerand en ook gebyt. Die vrou het na haar voertuig gehardloop, maar die man het haar glo gevolg en die agterruit van die motor beskadig.
Tydens die polisie-ondesoek het dit aan die lig gekom dat die vrou, wat tans in die hospitaal is, brandwonde opgedoen het toe sy haar vriend se motor aan die brand gesteek het. Die motor het heeltemal uitgebrand. Ná hospitaal-ontslag sal die vrou op aanklagte van aanranding en kwaadwillige saakbeskadiging teregstaan.
Volgens die polisie het die paartjie ’n geskiedenis van wedersydse klagtes teen mekaar. Vorige sake het nie noodwendig huishoudelike geweld betrek nie. Die polisie doen ’n beroep op mense in romantiese of huishoudelike verhoudings om hul konflik vreedsaam op te los of hulp te soek by vertroude persone, sodat geweld vermy kan word.
Die man sal binnekort in die hof verskyn.
