LIMPOPO. – Die liggaam van ’n man is Saterdagoggend op die hoek van Staal- en Riverstraat in Ladanna, Polokwane, tussen twee mini- elektriese substasies gevind. ‘n Geregtelike doodsondersoek is by Westernburg-polisiekantoor geregistreer.
Luidens ‘n verklaring van die polisiewoordvoerder, brig. Hlulani Mashaba, is polisiebeamptes kort ná 07:00 na ’n klagte ontbied oor ’n persoon wat glo tussen twee substasies vasgekeer was. Met hulle aankoms op die toneel is ‘n liggaam aangetref. Voorlopige waarnemings het getoon dat drie elektriese kabels onder een van die substasies gesny is, terwyl ’n boutsnyer en ’n paar handskoene langs die liggaam aangetref is.
Alle rolspelers was op die toneel teenwoordig. Die identiteit van die oorledene is in hierdie stadium onbekend en die ondersoek duur voort om die omstandighede van die voorval te bepaal.
Volgens Polokwane Weekly het die voorval naby Bosveld Scrap Metal plaasgevind.
