GAUTENG. – ‘n Rusie wat glo Donderdag op die perseel van die Gekombineerde Skool Schaumburg in Hartebeespoortdam uitgebreek en by die bus-laaigebied vererger het, het tot die dood van ‘n gr. 12-leerling gelei. Die busbestuurder het na bewering uit vrees vir sy veiligheid weggery, waartydens vier leerlinge getref is.
Volgens Steve Mabona, woordvoerder van die Gautengse Onderwysdepartement (GDO), het ’n graad 12-meisieleerling Sondag aan haar beserings beswyk. Die departement verduidelik in ’n verklaring dat die chaos begin het toe vier seuns glo deur ’n heining aan die agterkant van die skoolterrein die perseel betree het. Die groep het na bewering ’n rusie met matriekleerlinge begin, wat ná die eksamen op pad huis toe was.
Die situasie het versleg toe leerlinge van laer grade onordelik opgetree het. Onderwysers moes ingryp en het leerlinge na die busse begelei in ’n poging om orde te herstel. By die bus-laaigebied het spanning verder opgevlam toe sommige leerlinge na bewering probeer het om beheer van die busse oor te neem. In die verwarring het ’n busbestuurder weggetrek, glo om homself te beskerm, en drie graad 12-leerlinge asook ’n graad 10-leerling is in die proses deur die bus gestamp.
Nooddienste is ontbied en die beseerde leerlinge is na ‘n nabygeleë hospitaal vervoer. Drie gr. 12-leerling is opgeneem, van wie een later na ’n hospitaal in Ga-Rankuwa oorgeplaas is. Die leerling het Sondag aan haar beserings beswyk. Die polisie ondersoek die voorval en die omstandighede wat tot die voorval gelei het.
Mabona sê die departement sal distrikbeamptes en psigososiale ondersteuningspanne na die skool stuur word om ondersteuning aan leerlinge, personeel en betrokke families te bied. Die departement sal voortgaan om saam met wetstoepassingsowerhede te werk rakende verdere stappe teen individue wat die voorval aangevuur het.
