Die Suid-Afrikaanse Polisiediens se mediese skema, Polmed, het Woensdag ’n nuwe mobiele kliniek bekendstel wat daarop gemik is om gesondheidsorgdienste nader aan SAPD-lede en hul afhanklikes te bring.
In ‘n gesamentlike verklaring sê brig. Athlenda Mathe van die polisie en Molegoheng Molefe van Polmed die inisiatief word beskryf as ’n belangrike mylpaal in Polmed se verbintenis om die gesondheid en welsyn van polisielede te verbeter, veral in afgeleë gebiede waar beamptes woon, werk en diens verrig. Volgens Polmed sal die mobiele kliniek toegerus wees om toegang tot omvattende primêre gesondheidsorg te verbeter, plaaslike betrokkenheid deur veldtogte en gesondheidsopvoeding verhoog en intydse data-insameling vir beplanning en reaksie verbeter. Die kliniek sal onder meer op-die-terrein siftingsdienste, die bestuur van chroniese siektes, geestesgesondheidsberading en verskeie welstandsdienste by polisiestasies lewer.
Die mobiele kliniek sluit patologie-, oogkundige en tandheelkunde-dienste, X-strale en selfs mammogram-skandering in.
