WES-KAAP. – Die nasionale seereddingsinstituut (NSRI) het ’n waarskuwing uitgereik oor die volmaan-springgety wat vanaf 4 Desember sy hoogtepunt bereik het. Dit sal na verwagting die naweek se getytoestande merkbaar beïnvloed.
Andrew Ingram van die NSRI sê springgety ontstaan wanneer die son, maan en aarde in lyn is, wat die gravitasietrekking op die oseane versterk. Dit lei tot hoër hoogwater, laer laagwater en ’n groter verskil tussen getyvloei en -eb.
Die NSRI verduidelik dat springgetye sterker stroomversnellings veroorsaak, veral in nou inlate. Dit kan gevaarlik wees vir strandgangers. Seestrome raak kragtiger, waartydens kuspaaie en sekere roetes ontoeganklik kan raak tydens hoogwater. Hengelaars moet bedag moet wees op golwe wat verder as gewoonlik kan uitslaan.
Die NSRI beveel aan dat die publiek veiligheidsriglyne volg. Dit sluit in om by strande met lewensredders te swem, tussen die rooi en geel vlae te bly en daaglikse weervoorspellings en getytafels dop te hou. Strandgangers, hengelaars en kusstappers moet hul aktiwiteite om die getye verander, terwyl roeiers en booteienaars lewensreddingsbaadjies moet dra en noodtoerusting moet saamneem.
Die publiek word verder aangeraai om kinders fyn dop te hou en alkohol te vermy wanneer aktiwiteite in of naby water plaasvind. Daar moet ook kennis geneem word van weerwaarskuwings, veral ná swaar reën of sterk winde.
Die NSRI beklemtoon dat die effek van springgetye vir ’n paar dae kan voortduur en herinner mense daaraan om voorsorg te tref en plaaslike veiligheidsinligting op te volg.
