KWAZULU-NATAL. – John Steenhuisen, die minister van landbou, sê die regering gaan sy optrede verskerp om die voortdurende bek-en-klouseer-uitbreking in KwaZulu-Natal beter te beheer. Die provinsie is steeds die swaarste getref, met die meeste gevalle wat landwyd aangemeld is.
Steenhuisen sê boere, veral suiwelprodusente in gebiede soos Kokstad, Dundee, Underberg en Dannhauser, ervaar ernstige verliese en ontwrigting. Hy sê ondanks die inenting van meer as 900 000 diere die afgelope maande, onbeheerde dierbeweging steeds die beheermaatreëls ondermyn.
Die departement het inenting en voorkomingsaksies in onder meer Estcourt en Kokstad verskerp, en beperkte verligting ingestel, wat die plaaslike verkoop van melk ná pasteurisasie insluit. Bedryfsorganisasies soos die Rooivleisbedryfdienste en die Melkprodusente-organisasie het ook ondersteuning gebied met entstofvoorsiening.
Suiwelplase in Bergville, Estcourt, Winterton, Dundee en die Spioenkopdam-gebied het reeds bykomende entstof ontvang as deel van die versterkte veldtog.
Teen Februarie volgende jaar word nog twee miljoen entstofdosisse verwag, terwyl ’n nuwe vervaardigingsfasiliteit beplan word om plaaslike kapasiteit te verhoog. Die regering beoog om uiteindelik die nasionale trop sistematies in te ent, begin by die provinsies wat die swaarste geraak word.
