LIMPOPO. – ’n 66-jarige man wat tans op parool is, sal Maandag op ’n aanklag van moord in die Seshego-landdroshof verskyn, nadat hy na bewering sy meisie (56) tydens ‘n rusie met ’n motor doodgery het.
Luidens ‘n verklaring van die provinsiale polisiewoordvoerder, kol. Malesela Ledwaba, het die voorval in Seshego Zone 3 gebeur. Die voertuig is deur die man agtergelaat en hy het probeer vlug.
’n Lid van ’n private veiligheidsmaatskappy het hom in die omgewing opgemerk en die polisie ontbied. Hy is kort daarna in hegtenis geneem. Die vrou is op die toneel dood verklaar.
Ondersoeke het aan die lig gebring dat die verdagte ’n voormalige soldaat is wat ‘n lewensvonnis uitgedien het en gedurende 2022 op parool vrygelaat is. Hy was deur die Polokwane-hooggeregshof gevonnis vir die moord op drie vroue, insluitend sy destydse meisie, wat hy in Westenburg doodgeskiet het..
Die ondersoek duur voort.
