NOORD-KAAP. – Die polisie in die provinsie het ernstige kommer uitgespreek oor ‘n toename in kontakmisdade, insluitend poging tot moord, aanranding met die doel om ernstige liggaamlike beserings te veroorsaak, en verkragting.
Luidens ‘n verklaring van die woordvoerder, sers. Merapelo Pilane, word die publiek gewaarsku om waaksaam te bly en versigtig op te tree, beide in openbare ruimtes en woonbuurte, om die risiko om ‘n slagoffer van dié misdade te word, te verminder.
Pilane sê die volgende veiligheidsmaatreëls word aanbeveel:
- Vermy alleen stap in die donker of geïsoleerde gebiede.
- Hou jou afstand van onbekende persone.
- Moenie ritte van vreemdelinge aanvaar nie.
- Laat familie of betroubare persone weet waar jy is.
- Stap in goed verligte en besige strate en beweeg in groepe waar moontlik.
- Vermy onnodige konfrontasies.
- Wees altyd waaksaam en hou noodnommers byderhand.
- Vertrou jou instink en reageer vinnig as jy gevaar vermoed.
Die polisie moedig ook aan dat die publiek verdagte aktiwiteite en gevalle van mishandeling aanmeld en die stilte rondom geslagsgebaseerde geweld verbreek. Samewerking met gemeenskappe bly van kritieke belang in die stryd teen misdaad.
