NOORD-KAAP. – Die Britstown-polisie ondersoek ’n saak van strafbare manslag ná ’n noodlottige busongeluk wat Donderdag omstreeks 05:20 op die N12 tussen Britstown en Victoria-Wes plaasgevind het. Vier passasiers, twee mans en twee vroue, is op die toneel dood verklaar.
Kol. Cherelle Ehlers, polisiewoordvoerder, sê in ‘n verklaring volgens voorlopige inligting het die bestuurder van ’n Intercity-bus wat van Johannesburg af op pad was, beheer oor die voertuig verloor, waarna dit by ’n brug omgeslaan het. Daar was altesaam 42 passasiers op die bus ten tyde van die voorval. Agt passasiers het ernstige beserings opgedoen, insluitend een volwasse man, ses volwasse vroue en ’n babadogtertjie. Dertig passasiers het ligte beserings opgedoen. ’n Tweede Intercity-bus is ontbied om passasiers verder te vervoer.
Die oorsaak van die ongeluk word ondersoek.
