OOS-KAAP. – Drie verdagtes is Sondag tydens ‘n skietery met die polisie in die Tlokoeng-sakegebied dood.
Volgens brig. Nobuntu Gantana, provinsiale polisiewoordvoerder, het skoflede van Tlokoeng-polisiekantoor se gemeenskapsdienssentrum (aanklagtekantoor) omstreeks 14:30 ’n klagte van ’n skietvoorval ontvang. By aankoms op die toneel was lede van die nasionale intervensie-eenheid (NIU) reeds teenwoordig. Drie liggame van mans en drie voertuie, wat glo aan die verdagtes behoort, is op die toneel aangetref.
Voorlopige rapportering dui aan dat die NIU-beamptes op patrollie die verdagtes in ‘n voertuig opgemerk het. Toe die polisie die voertuig nader, is op hulle geskiet. Tydens ‘n oor-en-weer-skietery is die verdagtes noodlottig gewond. Vuurwapens wat vermoedelik in die skietvoorval gebruik is, is in beslag geneem en sal forensies ondersoek word.
Gantana bevestig die insident word deur Opod ondersoek.
