Die Suid-Afrikaanse vlieënier Rowan Tooth van Kimberley in die Noord-Kaap is internasionaal vereer nadat hy deel was van bemanning wat ’n Flydubai-passasiersvliegtuig ná ’n ernstige noodsituasie veilig laat land het.
Tooth is een van die bemanningslede wat op 27 Oktober in Abu Dhabi, in die Verenigde Arabiese Emirate (VAE), die Orde van Zayed II, eerste klas, ontvang het. Die onderskeiding erken die bemanning se moed en optrede om die veiligheid van die passasiers aan boord te verseker.
Die toekenning is deur die VAE se president, sjeik Mohamed bin Zayed Al Nahyan, toegeken en deur Dubai se kroonprins, sjeik Hamdan bin Mohammed bin Rashid Al Maktoum, oorhandig.
Die erkenning volg op ’n voorval op 30 September aan boord van Flydubai-vlug FZ1073, wat van Dubai na Tel Aviv onderweg was.
’n Ernstige onderonsie het in die stuurkajuit ontstaan toe die medevlieënier na bewering die kaptein aangeval het. Ander bemanningslede en passasiers het ingegryp om die situasie onder beheer te bring.
Tooth was as ’n aflosvlieënier aan boord. Hy en ’n ander vlieënier het gehelp om beheer oor die vliegtuig te herwin voordat dit na die Tabuk-lughawe in Saoedi-Arabië herlei en veilig geland is.
Flydubai het bevestig dat al 172 mense aan boord veilig was. Die kaptein, wat tydens die voorval beseer is, het ná mediese goedkeuring na die VAE teruggekeer.
Die omstandighede van die voorval word steeds ondersoek.
Die VAE se president het die betrokke bemanningslede persoonlik ontvang en hul moed, professionaliteit en verantwoordelike optrede geloof.
Flydubai se uitvoerende hoof, Ghaith Al Ghaith, het ook sy dank uitgespreek teenoor die vlieëniers wat die vliegtuig veilig geland het, die kajuitbemanning en die passasiers wat tydens die noodsituasie gehelp het.
Die Orde van Zayed II is ’n gesogte staatsonderskeiding wat ter erkenning van besondere diens en bydraes toegeken word.
Tooth se prestasie het ook in Suid-Afrika aandag getrek. Die vlieënier, wat oorspronklik van Kimberley afkomstig is, is een van die bemanningslede wie se optrede gehelp het om ’n moontlike lugramp te voorkom.
Bronne: Flydubai; VAE-presidensie; Dubai-protokolkantoor; Cape Town ETC.
