UKRAïNE – Wolodimir Zelenski, president van Ukraïne, het ‘n Russiese hommeltuigaanval op ‘n vol passasierstrein in die Kharkiv-streek as “terrorisme” bestempel. Ten minste vyf persone is gedood en verskeie gewond.
Die trein het meer as 200 passasiers gehad, toe een van die waens – met 18 passasiers – deur ‘n hommeltuigaanval getref is. Nog twee hommeltuie het in die omgewing ontplof.
Zelenski het gesê daar is geen militêre regverdiging om burgerlikes te teiken nie.
Rusland het nie op die aanval gereageer nie, alhoewel dit toenemend aanvalle deur hommeltuie en missiele op Ukraïne se energie- en vervoerinfrastruktuur loods.
Miljoene Ukraïeners is sonder water en elektrisiteit in een van die swaarste winters in jare.
Bronne: BBC, The Guardian
