KWAZULU-NATAL. – ’n Vrou en ‘n man is Dinsdag in ‘n skietvoorval en beweerde selfdood by ’n sakekompleks oorkant die Pavillion-inkopiesentrum in Westville, wes van Durban, oorlede.
Volgens die woordvoerder van ALS Paramedics, Garrith Jamieson, is nooddienste omstreeks 12:30 na die toneel ontbied. Ambulans- en veiligheidsdienste was reeds met hul aankoms op die perseel teenwoordig.
Daar word beweer dat ’n huishoudelike geskil tot die voorval gelei het, waartydens die man die vrou geskiet het voordat hy homself noodlottig beseer het. Hy is op die toneel dood verklaar. Die vrou, wat in ’n kritieke toestand was, is deur gevorderde lewensondersteunende paramedici gestabiliseer en na ’n hospitaal vervoer. Sy is onderweg oorlede.
Die polisie was op die toneel en het ’n ondersoek na die omstandighede van die voorval van stapel gestuur.
Nuusflits het kommentaar van die polisie gevra en wag op verdere besonderhede.
