LIMPOPO. – ‘n Skietvoorval Sondag omstreeks 02:35 in die erf van die Burgersfort-polisiekantoor het ‘n grootskaalse polisie-ondersoek ontketen. ‘n Vrou (28) is gewond en haar man (31) en ‘n vrou (39) het aan skietwonde gesterf.
Kol. Malesela Ledwaba, polisiewoordvoerder, sê in ‘n verklaring polisiebeamptes wat aan diens was het verskeie skote gehoor. Ondersoek is ingestel, waarna die jonger vrou met skietwonde langs die twee voertuie gevind is. Haar man is met skietwonde naby haar aangetref. ‘n Derde slagoffer, ’n vrou, is ook met skietwonde gekry.
Paramedici is ontbied, waarna die man en ouer vrou dood verklaar is. Die jonger vrou is na ‘n hospitaal geneem en ontvang tans mediese behandeling. Voorlopige ondersoek toon dat die oorlede man en die beseerde vrou getroud is. Daar word vermoed dat die man homself geskiet het. Die polisie ondersoek ook die omstandighede rondom die teenwoordigheid van die 39-jarige vrou op die toneel.
Tydens die ondersoek is ’n vuurwapen, ammunisie en patrone op die toneel gevind. Sake van moord, poging tot moord en ’n geregtelike doodsondersoek is geopen.
Die polisie se ondersoek duur voort.
