Die SPCA het vier hoenders in Maitland gered nadat hulle met toue aan hulle pote vasgebind is.
’n Lid van die publiek het die voorval op 21 Junie by die SPCA aangemeld. Inspekteurs Elani Steenkamp en Justin De Vos is na die toneel, waar die Maitland-polisie ook ondersteuning gebied het.
Met hulle aankoms het die inspekteurs die vier hoenders op die sypaadjie gekry. Die hoenders se pote was vasgebind, wat beteken het hulle kon nie behoorlik beweeg, water drink of kos eet nie.
Die smous kon geen permit toon nie. Die inspekteurs het die hoenders verwyder en na die SPCA se plaastuintjie in Grassy Park vervoer.
Die Wet op Dierebeskerming verbied die vasbinding van diere op ’n manier wat pyn, spanning of lyding veroorsaak. Enigiemand wat diere mishandel, kan strafregtelik vervolg word.
Mense kan die SPCA by 021 700 4158/9 skakel of ’n WhatsApp-boodskap oor beweerde dierewreedheid na 021 700 4140 stuur.
