KAAPSTAD – Die Springbokke het ’n veel beter eerste helfte teen die All Blacks by DHL-stadion gelewer en was rustyd 24-14 voor.
Die groot verskil teenoor verlede week se toets was die Bokke se vermoë om hul geleenthede beter te benut. Wanneer Suid-Afrika die All Blacks se 22 binnegedring het, het hulle veel meer daaruit gehaal, terwyl daar ook minder onnodige foute was.
Erasmus se voorryverrassing werk
Rassie Erasmus het voor die wedstryd vir ’n verrassing gesorg toe hy sy voorry verander het en spelers wat aanvanklik op die bank sou begin, in die beginspan ingeskuif het. Die kombinasie het goed gevaar en hul man teen die All Blacks gestaan.
Deon Fourie was in die eerste sowat 35 minute besonder invloedryk. Hy het sterk by die lynstane, dryfmaalbewegings en in algemene spel gewerk voordat die Bokke vars krag ingebring het.
Marx se duikslag ’n keerpunt
Malcolm Marx het kort voor rustyd ook ’n groot oomblik gelewer toe ’n harde duikslag ’n gevaarlike All Black-aanval gestuit en uiteindelik ’n aanslaan afgedwing het.
Die Bokke lyk fisiek sterk en meer klinies as ’n week gelede. Met ’n voorsprong van tien punte en nog baie krag beskikbaar, is die wedstryd goed opgestel vir Suid-Afrika om in die tweede helfte verder druk toe te pas.
Die All Blacks sal weet dat hulle vroeg ná rustyd moet reageer indien hulle nie wil toelaat dat die Bokke die wedstryd verder uit hul bereik neem nie.
Tweede toets van vierwedstrydreeks
Die wedstryd is die tweede toets van die Castle Double Malt Rugby’s Greatest Rivalry-reeks. Die All Blacks het die openingstoets verlede Saterdag met 33-16 in Johannesburg gewen, wat beteken Suid-Afrika moet in Kaapstad wen om die vierwedstrydreeks gelyk te maak.
Die toets is boonop ’n mylpaalgeleentheid vir kaptein Pieter-Steph du Toit, wat sy 100ste toets speel, terwyl loskopstut Ox Nche sy 50ste toets aanteken.
Lees ook meer oor die spanaankondiging vir die tweede toets, Siya Kolisi se fiksheid en die Springbokke se voorbereiding voor die wedstryd.
Foto: Johan Maree, Nuusflits
