Die Cape Organisation for the Democratic Taxi Association (Codeta) het ‘n nuwe kontantlose betaalstelsel aangekondig.
Vanaf 1 Junie sal dit van pendelaars verwag word om kaarte te gebruik wat geskandeer word wanneer hulle in die taxi’s klim.
“Ons stel ‘n nuwe kontantlose stelsel in ons taxibedryf bekend. Ons kliënte sal nou kaarte gebruik wat hulle skandeer wanneer hulle in ons voertuie klim,” het Nceba Enge, voorsitter van Codeta, gesê.
Enge sê dit is juis om kliënte te beskerm.
Hy het bygevoeg dat daar ook kameras in die taxi’s geïnstalleer sal word as deel van die nuwe stelsel om veiligheid en aanspreeklikheid binne die bedryf te verbeter. Enge voorsien dat die oorskakeling na hierdie nuwe tegnologie dalk uitdagings sal inhou tydens die vroeë fases van implementering.
Sommige pendelaar verwelkom die nuwe betaalstelsel, maar daar heers ook kommer oor hoe dit in die praktyk gaan werk.
Esethu Saliwa, ‘n taxipendelaar het taxibestuurders aangemoedig om geduldig te wees met passasiers terwyl hulle by die nuwe stelsel aanpas.
“Hierdie stelsels sal uitdagings hê, en soms sal die toestelle dalk nie skandeer nie. Taxibestuurders moet versigtig en geduldig met pendelaars wees,” het Saliwa gesê.
Bron: Businesstech
