WES-KAAP. – Die gedenkdiens vir Morné Fourie (16) van Malmesbury vind vandag vanuit die AGS-Kerk plaas. Morné het die vorige Saterdag ‘n motorfietsongeluk gehad en is Maandagoggend oorlede.
Theunis Fourie het op 24 November, die dag waarop sy seun gesterf het, vir gebed vir sy seun gevra. “Ek vra almal groot asb. om in gebed te gaan vir my seun Morné Pieter Fourie. Dit lyk nie goed nie.” Fourie het op West Coast Medical Rescue se sosialemediaplasing, oor ‘n tienerseun wat Saterdag verdrink het, gesê hy het sy seun Maandag verloor, en het medelye aan die ouers oorgedra.
A+ Educentre het ook Morné se afsterwe op hulle sosiale media bekend gemaak: “Ons deel met seer harte die afsterwe van een van A+ Educentre se geliefde leerders. Rus in vrede, Morné Fourie. Ons sal jou altyd onthou. Ons dink aan die Fourie-gesin, familie en vriende. Hou hulle asb. in julle gebede.”
Nicole Strydom het gesê: (Van Engels na Afrikaans vertaal) In liefdevolle nagedagtenis aan Morné Fourie (16). Dit is met groot hartseer dat ons die nuus deel dat Morné Fourie, ’n jong lid van ons familie, vandag tragies oorlede is ná ’n motorfietsongeluk. Op slegs 16 jaar oud was Morné se lewe gevul met potensiaal, vriendelikheid en ’n gees wat baie geraak het wat hom geken het. Sy heengaan laat sy familie nie net met ’n ondraaglike verlies nie, maar ook met die onverwagte finansiële druk wat met so ’n tragedie gepaard gaan. ’n Back-a-Buddy-inisiatief is geskep om die familie te help met begrafniskoste en ander verwante uitgawes in hierdie moeilike tyd. Indien jy kan, vra ons vriendelik dat jy ’n bydrae oorweeg. Enige skenking, groot of klein, sal baie vir die familie beteken terwyl hulle deur hierdie pynlike tyd gaan. Hou asseblief Morné se geliefdes in julle gedagtes, en dankie vir julle ondersteuning, medelye en dat julle die boodskap deel. Rus in vrede, Morné. Jy sal diep gemis word en vir altyd onthou word. Leana Engelbrecht Fourie en Theunis Fourie , mag die Here julle in hierdie tyd van hartseer dra.
Theunis Fourie het intussen ‘n tatoe ter ere van sy seun op sy bors laat aanbring.
Morné word deur sy pa, Theunis, en ma, Leane Engelbrecht Fourie, asook sibbe en uitgebreide familie oorleef.
Foto’s: Theunis Fourie
