NOORD-KAAP. – Vier verdagtes is Saterdag vir die onwettige jag van ‘n impala (rooibok) in hegtenis geneem en daar is op drie jaggewere beslag gelê.
Sers. Merapelo Pilane sê tydens operasie Vala Umgodi in die Namakwa-distrik is inligting van onwettige mynery op ‘n wildplaas opgevolg. ‘n Mitsubishi Colt-bakkie met vier insittendes het weggejaag toe die polisie opgemerk is. Die taktiese reaksie-eenheid het die voertuig tot stilstand gedwing en deursoek.
“‘n Rooibok-karkas, asook drie jaggewere is gevind. Verdere ondersoek het aan die lig gebring dat die vier verdagtes geen jagpermit het nie. Die plaaseienaar het geen kennis gedra van mense wat op sy plaas jag nie.”
Daar is op die karkas en vuurwapens beslag gelê.
Die verdagtes sal vandag op aanklagte van betreding en onwettige jag in die Port Nolloth-landdroshof voorkom.
Foto: SAPD
