MPUMALANGA. – Blessing Fakude word deur die polisie gesoek vir sy beweerde betrokkenheid by kapt. Sibusiso Mthombothi (44) se dood by ‘n karwassery in Kanyamazane op 13 Januarie 2024.
Kapt. Dineo Lucy Sekgotodi sê die Kabokweni-landdroshof het op 22 April ‘n lasbrief vir Fakude se inhegtenisneming uitgereik.
Jacky Sibusiso Ntiwane (Maseko) (35) is op 20 Maart vir sy beweerde betrokkenheid by die moordsaak in hegtenis geneem. Polisielede het die oggend omstreeks 02:00 die huis van die gewapende verdagte genader. Hy is in hegtenis geneem en het op 22 Maart in die hof verskyn, waarna sy saak vir borgaansoek tot 4 April uitgestel is. Hy het tydens die hofverskyning borg vir sy eie veiligheid laat vaar. Die saak is tot 10 Mei uitgestel en hy bly in aanhouding.
Gen.maj. Gerber, provinsiale hoof van die Valke, versoek Fakude om na vore te kom. Enigiemand wat weet waar Fakude hom bevind, kan kapt. Mduduzi Comfort Mkhonza by 082 304 00520 kontak.
