GAUTENG. – Altesaam 10 tienerseuns is Dinsdag in Johannesburg gered en ’n buitelandse burger (47) in hegtenis geneem.
Luidens ‘n verklaring van kol. Katlego Mogale van die Valke is ‘n gesamentlike operasie deur verskeie rolspelers geloods nadat JMPD-beamptes tydens patrolliediens op agt halfnaakte tieners wat in Broadstraat in Mulbarton gestap het, afgekom het. Daar is vasgestel dat die tieners van die buiteland is en nie Engels kon praat nie. Nog twee seuns was reeds in ’n blou VW Jetta weggery. Die voertuig is later in die gebied opgespoor, waarop die bestuurder gevlug het. ’n Jaagtog het gevolg wat in Commissionerstraat geëindig het. Die twee tieners in die voertuig is gered en die verdagte is in hegtenis geneem.
Hy sal Donderdag op aanklagte van oortreding van die immigrasiewet en vermoedelike mensehandel in die Booysens-landdroshof voorkom. Die ondersoek duur voort.
