OOS-KAAP. – 10 voertuie is beskadig en ’n gebou in North End gedeeltelik aan die brand gesteek toe ’n protesoptog oor die beweerde kroning van ’n Igbo-koning in Ku Gompo (Oos-Londen) Maandag gewelddadig geraak het.
Brig. Nobuntu Gantana, polisiewoordvoerder, sê die betoging het aanvanklik vreedsaam begin, maar geweld het uitgebreek toe sommige deelnemers wegbeweeg het van die stadsaal waar ’n petisie oorhandig is. Brandbestryders het betyds opgedaag om die vlamme by die gebou te blus, terwyl tien voertuie intussen beskadig is. Vroeër is aangedui dat meer voertuie en verskeie geboue moontlik geraak is. Albany-, Buffalo- en Oxfordstraat is die ergste geraak en die publiek is versoek om uiters versigtig te wees in dié gebiede.
Openbare-orde-polisiëring en ander nooddienste bly op die toneel teenwoordig om die situasie te monitor. Geen beserings is tot dusver aangemeld nie en geen inhegtenisnemings is nog gemaak nie. Die situasie bly gespanne en verdere inligting sal bekend gemaak word soos dit beskikbaar raak.
One Response
9dhdl9