MPUMALANGA. – Andile Sibusiso Shongwe (26) en Muzi Mandoza Jele (29), voormalige werkers van Magdalene Johanna Coetzee (74) van Carolina, is elk tot 25 jaar direkte tronkstraf vir haar moord en roof met verswarende omstandighede gevonnis.
Monica Nyuswa, NVG-woordvoerder, sê die Hooggeregshof het gehoor dat die twee mans op 13 Oktober 2024 die vrou by haar woning in Hugostraat aangeval en versmoor het, voordat hulle die huis deursoek en met van haar besittings gevlug het. Haar liggaam is later deur ’n buurman ontdek wat bekommerd geraak het. Die mans is kort daarna aangekeer toe hulle probeer het om die oorledene se skootrekenaar te verkoop en nie ’n geloofwaardige verduideliking kon gee nie. Dit het tot hulle inhegtenisneming gelei. Die hof het bevind dat hulle ’n vertrouensposisie misbruik het en geen berou getoon het nie en het staatsgetuienis as geloofwaardig geag. Hulle is ook onbevoeg verklaar om vuurwapens te besit.
Albei is ook tot 15 jaar tronkstraf vir roof gevonnis, maar dié vonnis sal saam met die moordvonnis uitgedien word, wat beteken hulle sal effektief 25 jaar tronk toe gaan.
