LIMPOPO. – Twee tienermeisies, 14 en 15 jaar oud, is dood nadat hulle Saterdagnag uit ‘n bewegende voertuig gespring het en op die Alberto-brug naby Ga-Motodi in die Tubatse-polisiëringsgebied raakgery is. Nog twee meisies het oorleef.
Volgens kol. Malesela Ledwaba, polisiewoordvoerder, is die polisie vir ‘n ongeluk na ‘n ongelukstoneel ontbied. Op die toneel is nooddienste aangetref wat ‘n meisie dood verklaar het. Volgens die voorlopige ondersoek het vier minderjarige meisies omstreeks 23:00 ‘n saamrygeleentheid in ‘n onbekende VW Polo aanvaar, met die doel om na Ga-Motodi te reis. Toe die voertuig van rigting na Alberton verander het, het die meisies besluit om uit die bewegende voertuig te spring en te vlug. Terwyl hulle gehardloop het, is twee van die meisies deur ‘n wit VW Polo wat in die teenoorgestelde rigting gery het, raakgery. Die voertuig het op die toneel gestop. Die 14-jarige het op die toneel gesterf, terwyl die 15-jarige in die rivier onder die brug geval het. Polisieduikers het haar liggaam Sondag gekry.
‘n Saak van strafbare manslag is geopen en die ondersoek duur voort.
