GAUTENG. – Twee verdagtes is in hegtenis geneem ná twee beweerde straatrooftogte wat Vrydag in die General Alberts Park- en Mayberry Park-omgewing plaasgevind het.
CPS Security sê saam met React 24 is die verdagte voertuig opgespoor en die twee verdagtes later by ’n perseel in die omgewing aangetref. Tydens die operasie is ’n speelgoed- of “blank”-vuurwapen en vermoedelike dwelms (Mandrax) gevind. Verskeie gesteelde items, insluitend selfone, is later by ’n plaaslike pandjieswinkel teruggevind. Een van die slagoffers het reeds ‘n saak oopgemaak en inwoners wat moontlik ook slagoffers van rooftogte was, word aangemoedig om na vore te kom.
Beamptes van die Alberton-polisiekantoor het die verdagtes in hegtenis geneem.
