OOS-KAAP. – Thina Mpuhlu (45) en Thembeka Bendon (50) is in die Gqeberha-streekhof skuldig bevind aan bedrog en geldwassery, nadat ‘n weduwee (64) in ‘n aanlyn romansebedrogspul van meer as R506 000 beroof is. Die vonnisoplegging sal op 21 Augustus plaasvind.
Luxolo Tyali, NVG-woordvoerder, sê die hof het bevind dat Mpuhlu en Bendon saam met ander mense wat nog nie geïdentifiseer is nie, die vrou se vertroue gewen het deur ‘n vals romantiese verhouding te skep.
Die klaagster, ‘n afgetrede wiskunde-onderwyseres en weduwee, het in 2014 op Facebook met ‘n man kennis gemaak wat hom as “Mario Bertolini” voorgedoen het. Hy het oor weke heen vir haar honderde boodskappe gestuur en haar laat glo dat hy ‘n ernstige verhouding met haar wou hê. Nadat “hy” haar vertroue gewen het, het hy haar oorreed om geld oor te betaal vir verskeie sogenaamde noodgevalle, onder meer ‘n familietroue in Italië, sy dogter se mediese behandeling en ‘n beweerde belastingprobleem. Hy het telkens verskonings gemaak waarom hy haar nie persoonlik kon ontmoet nie.
Die hof het gehoor dat die klaagster tussen 17 April en 5 Mei 2014 altesaam R505 981 in bankrekeninge oorbetaal het wat deur die bedrieërs aangedui is. Die geld was in rekeninge van die twee vroue, asook ‘n maatskappy waarvan Bendon die enigste direkteur is, voordat dit onttrek of bestee is. Met bankrekords en elektroniese bewyse het die staat bewys dat die twee vroue geweet het, of redelikerwys moes geweet het, dat die geld uit misdaad afkomstig was en dat hulle gehelp het om die oorsprong daarvan te verbloem.
Adv. Samkelo Mtwana, die waarnemende direkteur van openbare vervolging in die provinsie, sê dié skuldigbevinding wys dat aanlyn romansebedrog ernstige finansiële en emosionele gevolge vir slagoffers inhou en dat die NVG sal voortgaan om diegene wat by sulke bedrog betrokke is, voor die hof te bring. Die NVG waarsku mense om versigtig te wees wanneer hulle aanlyn verhoudings aanknoop en om nie geld oor te betaal aan iemand wat hulle nog nie persoonlik ontmoet het of wie se identiteit nie bevestig is nie.
