GAUTENG. – Drie mense is in Hillbrow in hegtenis geneem ná ’n skietvoorval tydens ’n betoging op 30 Junie waarin twee mense, onder wie ’n 17-jarige tiener, beseer is.
Volgens die polisie word daar beweer dat die drie verdagtes op betogers geskiet het wat in die straat verbybeweeg het. Twee mense is tydens die voorval gewond. Ná die skietery het betogers glo die verdagtes se voertuig aan die brand gesteek. Die polisie het die drie verdagtes in hegtenis geneem en twee gelisensieerde vuurwapens, wat vermoedelik in die voorval gebruik is, vir verdere ondersoek in beslag geneem.
Die verdagtes sal binnekort op aanklagte van poging tot moord in die Johannesburg-landdroshof verskyn.
Bron: SAPD
