GAUTENG. – 30 speurders by die Olievenhoutbosch-polisiekantoor moet een rekenaar deel, terwyl daar net drie stoele vir hulle beskikbaar is. Dit is van die tekortkominge wat Ian Cameron, parlementêre voorsitter van die portefeuljekomitee vir die polisie, tydens ’n toesigbesoek saam met Cilliers Brink van die DA aan vier polisiekantore in Pretoria en omgewing uitgewys het.
Cameron sê die besoeke aan Olievenhoutbosch, Pretoria-Wes, Akasia en Lyttelton het ernstige tekorte aan infrastruktuur en toerusting blootgelê. By Olievenhoutbosch gebruik polisiebeamptes hul eie selfone vir ondersoeke en dien ’n sleepwa steeds as kantoorruimte. Pretoria-Wes se fasiliteite is beknop en die slagoffervriendelike fasiliteit bied onvoldoende ruimte en privaatheid. By Akasia ontbreek elektrisiteit, ’n wagarea en ’n afsonderlike privaat beradingskamer. Lyttelton beskik oor net twee klagte-reaksievoertuie, terwyl vier benodig word. Die verlies aan aanhoudingsfasiliteite beteken ook dat aangehoudenes na ander polisiekantore vervoer moet word, wat verdere druk op die beskikbare voertuie plaas.
Cameron sê hy was beïndruk deur die optimisme onder polisiebeamptes by Lyttelton, ondanks die moeilike omstandighede waaronder hulle werk. Hy beklemtoon dat polisiebeamptes die nodige toerusting en infrastruktuur moet kry om hul werk behoorlik te kan doen. Hy doen ’n beroep op die SAPD-bestuur om aanspreeklikheid te aanvaar en befondsde oplossings met duidelike sperdatums te verskaf. Cameron sê hy sal terugvoer gee oor die vordering met die kwessies wat tydens die besoeke geïdentifiseer is.
