WES-KAAP. – Die Stad Kaapstad se brand-en-reddingsdiens is met 35 nuwe junior brandbestryders versterk, nadat hulle hul opleiding suksesvol voltooi en permanente aanstellings ontvang het. Hulle sal by brandweerstasies regoor die metro ontplooi word.
JP Smith, burgemeesterskomiteelid vir veiligheid en sekuriteit in die Stad Kaapstad, sê die nuwe aanstellings kom op ‘n belangrike tyd, aangesien die vraag na die stad se nooddienste die afgelope paar jaar aansienlik toegeneem het. Volgens Smith het die brand-en-reddingsdiens se werkslading van 22 497 voorvalle in die 2018/19-boekjaar tot 30 513 in die 2025/26-boekjaar gestyg. Dit sluit onder meer brande, motorongelukke, reddingsoperasies en voorvalle met gevaarlike stowwe in. Hy sê die groei van die stad en die toename in uiterste weerstoestande plaas al hoe groter druk op die diens, maar die nuwe brandbestryders sal help om dié uitdagings die hoof te bied.
Die stad gaan vanjaar meer as R25 miljoen in die brand-en-reddingsdiens belê. Die geld sal onder meer aangewend word vir die opgradering van brandweerstasies, die aankoop van spesiale voertuie, verbeterings aan infrastruktuur, die ontwikkeling van ‘n nuwe brandweerstasie in Langa en die vervanging van toerusting.
Smith het die nuwe brandbestryders met hul aanstellings gelukgewens en inwoners aangemoedig om hul deel te doen om brande te voorkom en nooddienste te ondersteun wanneer hulle op voorvalle reageer.
