KWAZULU-NATAL. – Vier verdagtes is Donderdagmiddag tydens ’n skietery met die polisie by Adam’s Mission in die KwaMakhutha-gebied, suid van Durban, dood.
Luidens ‘n verklaring van polisiewoordvoerder, kol. Robert Netshiunda, was die polisie met ‘n intelligensiegedrewe operasie besig toe hulle ’n voertuig onderskep het wat volgens beskrywing met ’n reeks gewelddadige misdade, insluitend huisroof, gewapende rooftogte, ontvoerings en kapings, in Umbumbulu verbind word. ’n Skietery het in Sheleniweg uitgebreek waartydens die vier verdagtes noodlottig gewond is.
Een verdagte het ontsnap en ’n soektog is aan die gang na hom. Geen polisielid is beseer nie.
