KWAZULU-NATAL. – Vyf verdagtes is in hegtenis geneem nadat daar vroeg Dinsdagoggend in Woody Glen, ‘n Mpumalanga-woonbuurt in Hammarsdale, by verskeie houerwinkels (containers) ingebreek is. Die polisie het inwoners wat aan optogte deelneem, versoek om hulle van geweld, misdadige optrede en intimidasie te weerhou.
Polisiewoordvoerder kol. Robert Netshiunda sê beamptes het vinnig opgetree nadat berigte ontvang is van ‘n groep mense wat by die houerwinkels in Embuthweni-hoofweg, Eenheid 4, ingebreek het. Een verdagte is in ‘n winkel aangekeer, terwyl die ander vier vasgetrek is toe hulle probeer weghardloop het. Die verdagtes, tussen 14 en 27 jaar oud, sal na verwagting van sake-inbraak en kwaadwillige beskadiging van eiendom aangekla word en binnekort in die hof verskyn.
Hoewel die polisie optogte sal beveilig, sal enige oortreding van die wet streng hanteer word.
