LIMPOPO. – ’n Ernstige ongeluk het vanoggend (Woensdag) die lewens van vyf mense geëis, terwyl nog twee persone met ernstige beserings in die hospitaal opgeneem is. Die ongeluk met drie voertuie het kort voor 08:00 op die N1 naby Boekenhout in die Waterberg-distrik plaasgevind.
Tshifhiwa Dali, woordvoerder vir Violet Mathye, die LUR vir vervoer en gemeenskapsveiligheid, sê volgens inligting blyk dit dat ’n Renault ’n U-draai op die snelweg probeer maak het, wat tot ’n ongeluk van voor met twee ligte afleweringsvoertuie – ’n Ford en ’n Toyota – gelei het. Onder die oorledenes is twee bestuurders en drie passasiers van een van die voertuie. Die twee beseerdes is vir verdere behandeling na die FH Odendaal-hospitaal geneem.
Die oorsaak van die ongeluk word nog ondersoek, maar roekelose bestuur en moontlike alkoholgebruik word as faktore oorweeg.
Mathye het haar diepe hartseer en medelye met die slagoffers se families uitgespreek. Sy het ook die beseerdes sterkte toegewens vir hul herstel. Mathye het padgebruikers opnuut versoek om versigtig en verantwoordelik te bestuur, veral met die toename in verkeer tydens die Paasnaweek.
One Response
66ent1