INTERNASIONAAL. – Klein Kwagga, geliefde klein Suid-Afrikanertjie wat sedert sy optrede tydens ‘n danskonsert van sy suster op die maat van Lyfie van Bernice West in die harte van baie mense ingedans het, het ‘n skattige video vir Kelly Clarkson in die VSA gemaak.
Clarkson, wat Amerika se heel eerste Idol was, het geen bekendstelling nodig nie en spog met haar eie kletsprogram die Kelly Clarkson Show van waar sy kontak met Klein Kwagga gemaak het.
“Groot was ons opgewondenheid toe die @kellyclarksonshow vir Kwagga ‘n 𝘏𝘪, 𝘒𝘦𝘭𝘭𝘺-video vra. Met trots kan ons aankondig dat sy só ingenome daarmee was, dat hy vir ‘n aanlyn onderhoud genooi is!”
Die onderhoud van Clarkson met Suid-Afrika se eie klein superster vind op 12 Februarie plaas. Dit kan op NBC of die program se YouTube-kanaal gesien word.
Kom ons kyk of ons lesers die titels van Kelly Clarkson-liedjies uit die strategiese boodskap van Klein Kwagga kan vind. Laat weet gerus in die kommentaar watter liedjies jy kan identifiseer.
Volg FiND iT se Facebookblad hier en klik hier om ons app af te laai. Klik hier vir vandag se nuutste nuus.
