Die Europese Unie het Israël se aanvalle in Gaza gekritiseer en gesê dit gaan “verby wat nodig is om Hamas te beveg”. Die EU se buitelandse hoof, Kaja Kallas, het ook die nuwe hulpverdelingsmodel wat deur die VSA en Israel ondersteun word, verwerp. Hierdie model omseil die VN en ander hulporganisasies.
“Ons ondersteun nie die privatisering van humanitêre hulp nie. Hulp kan nie as ‘n wapen gebruik word nie,” het Kallas gesê. Volgens die Hamas-gesondheidsministerie het Israel se aanvalle sedert Maart 3,924 mense gedood, waaronder baie burgers. Israel beweer hulle mik slegs op Hamas en werk aan die vrylating van gyselaars.
Duitsland se nuwe kanselier, Friedrich Merz, het gesê hy “verstaan nie meer” Israel se doelwitte in Gaza nie. Die EU, een van die grootste hulpverskaffers aan Gaza, sê die meeste hulp bereik nie die mense nie, weens Israel se blokkade. Die VN waarsku dat 2,1 miljoen inwoners katastrofiese honger ervaar.
Die VK, Frankryk en Kanada het ook hul ergste kritiek tot nog toe geuiter, met die VK wat handelskikkings met Israel opgeskort het. Die EU oorweeg nou om hul eie handelsooreenkoms met Israel te hersien.
Israel en die VS ondersteun ‘n nuwe hulpstelsel wat deur die omstrede Gaza Humanitarian Foundation (GHF) bestuur word, maar die VN verwerp dit as oneties. Intussen het die Israelse premier, Benjamin Netanyahu, bevestig hy beplan om Gaza se bevolking na ‘n “steriele sone” in die suide te verskuif, wat deur baie as gedwonge verdrywing beskou word.
Die konflik het begin ná Hamas se aanval op 7 Oktober 2023, waar 1,200 mense gesterf het. Volgens Gaza se gesondheidsministerie het meer as 54,000 mense sedertdien in die oorlog gesterf.
Bron: BBC
