KWAZULU-NATAL. – ‘n Man in sy sestigs is Dinsdagoggend net na 07:00 in ‘n enkelmotorvoertuigongeluk in Bill Woodweg in die Queensmead- industriële gebied dood nadat sy voertuig teen ‘n wal afgery en in ‘n rivier beland het.
Garrith Jamieson an ALS Paramedics sê dié diens het op die toneel aangekom en gevind dat ‘n enkelmotorvoertuig beheer verloor, die pad verlaat het en verskeie kere omgerol het. Die voertuig is teen ‘n wal af en het in die rivier tot stilstand gekom. Gevorderde lewensondersteunende paramedici is na die toneel waar die man as enigste insittende van die voertuig dood verklaar is.
Die oorsaak van die ongeluk word deur die polisie ondersoek.
