NOORD-KAAP. – Samkelo Komazi (26) van Kimberley is deur die plaaslike streekhof vir die moord op Donovan Reed (23) in Desember 2023 in die sentrale sakegebied tot 15 jaar tronkstraf gevonnis. Monti van Wyk (26) sy mede-beskuldigde, is op aanklagte vrygespreek.
Mojalefa Senokoatsane, NVG-woordvoerder, sê volgens hofrekords het Reed en sy vriend op die aand van 22 Desember 2023 op pad huis toe ’n argument met ’n onbekende vrou gehad. Die vrou het dit later vir Komazi, wat haar kêrel was, vertel. Komazi en Van Wyk het Reed en sy vriend gekonfronteer, messe uitgehaal en Reed in die maag gesteek. Reed is op die toneel oorlede.
Die verdagtes is daarna in hegtenis geneem. Tydens die verhoor het twee sleutelgetuies – Reed se vriend en ’n plaaslike restauranteienaar – vir Komazi as die beskuldigde geïdentifiseer. Die hof het hulle getuienis as geloofwaardig en konsekwent bevind.
Mothelesi Katlego Thothela, die staatsaanklaer, het ter strafverswaring benadruk dat die moord wreed en sinneloos was en dat Komazi geen respek vir lewe getoon het nie. ’n Slagoffer-impakverklaring het die gesin se pyn en trauma duidelik gemaak.
Die hof het die staat se aanbeveling aanvaar dat sulke gewelddadige misdade streng gestraf moet word en het Komazi tot 15 jaar tronkstraf gevonnis.
