WES-KAAP. – ’n Skoolleerling is Vrydagoggend per reddingshelikopter uit ’n afgeleë deel van die Sederberge gevlieg nadat hy deur ’n slang aan die hand gepik is terwyl hy sy skoenveters vasgemaak het.
Wilderness Search and Rescue (WSAR) sê in ‘n plasing op sosiale media ‘n groep was vanaf Kromrivier na Sneeuberg toe die voorval gebeur het. Omdat die uitstappie vooraf deeglik beplan is, het elke groep ’n vasgestelde kommunikasieplan gevolg en hulle kon hulle ligging met Garmin InReach-toestelle monitor. Die tieners het vinnig opgetree deur die slang af te neem om die spesie vas te stel en dadelik vir noodhulp te vra.
’n Reddingspan van die Wes-Kaapse departement van gesondheid en welstand-nooddienste, in samewerking met Air Mercy Service, is ontbied en het met die seun van die berg af gevlieg. Hy is vir verdere mediese hulp na Kaapstad geneem.
Die voorval beklemtoon die belangrikheid van deeglike beplanning, vinnige reaksie en toepaslike toerusting wanneer groepe in afgeleë berggebiede stap.
