NOORD-KAAP. – Angelique Louw (35) is deur die Hopetown-streekhof effektief agt jaar direkte tronkstraf opgelê, nadat sy tydens ’n gewelddadige voorval warm olie oor drie mense uitgegooi het.
Mojalefa Senokoatsane, NVG-woordvoerder, sê Louw is op aanklagte van poging tot moord gevonnis. Louw is ook op elk van twee aanklagte van aanranding met die opset om ernstig te beseer twee jaar tronkstraf opgelê. Volgens die staat het ’n argument tussen Louw en ’n ander vrou in ’n fisieke bakleiery ontaard. Nadat die bakleiery beëindig is, het Louw glo na die kombuis gegaan en met ’n pot warm olie teruggekeer wat sy oor die vrou uitgegooi het. Die vrou het ernstige brandwonde opgedoen, terwyl twee mans ook beseer is toe die olie op hulle gespat het.
Louw het onskuldig gepleit en beweer iemand het die pot uit haar hande gestamp, maar teenstrydighede in haar getuienis tydens kruisondervraging het haar weergawe ondermyn. Die hof het uiteindelik die staat se getuienis as betroubaar aanvaar en haar skuldig bevind. ’n Slagoffer-impakverklaring wat aan die hof voorgelê is, het ook die groot fisiese en emosionele impak van die aanval op die slagoffers uitgelig voordat vonnis opgelê is.
