Springbokke teen All Blacks is die groot trekpleister van die Castle Double Malt Rugby’s Greatest Rivalry-reeks, en Springbok-assistentafrigter Mzwandile Stick en kaptein Pieter-Steph du Toit is opgewonde oor wat hulle ’n “spesiale toernooi” noem.
Stick en Du Toit het met die media gepraat nadat die Bokke hulle veldvoorbereiding vir Saterdag se eerste toets tussen die twee rugbyreuse by 10bet Ellis Park afgehandel het.
Hulle het ook hulle vreugde uitgespreek oor senter Damian de Allende, wat die besondere mylpaal bereik om net die 10de speler in die Springbokke se geskiedenis te wees wat die groen en goud in sy 100ste toets dra.
“Hierdie is die oomblikke waarvoor ons leef”
“Om vier wedstryde in een seisoen teen die All Blacks te speel, gaan altyd ’n groot uitdaging wees,” het Stick gesê.
“Hierdie is die oomblikke waarvoor ons leef. Die naaste ding aan die Greatest Rivalry, in terme van ’n reeks waar elke wedstryd tel, is waarskynlik ’n reeks teen die Britse en Ierse Leeus of die uitklopfases van die Wêreldbeker, en ons ingesteldheid vir hierdie wedstryde sal op daardie ervarings steun.”
Stick het bygevoeg: “Om ons land te verteenwoordig, is iets wat ons nie as vanselfsprekend aanvaar nie. Ons weet dit gaan ’n taai uitdaging wees. Die All Blacks is in ’n goeie plek en speel baie goed. Maar van ons kant af wil ons ook aanhou verbeter en ontwikkel, en ons sal nooit gemaklik raak nie. Dit raak nie moeiliker as om vier weke agtereenvolgens teen die All Blacks te speel nie, en ons is opgewonde daaroor.”
Ellis Park lê na aan Du Toit se hart
Du Toit was net so opgewonde oor die geleentheid: “Dit is ’n baie ander toernooi. Om by ’n reeks soos hierdie betrokke te wees en Nieu-Seeland in Suid-Afrika te sien speel, en ook om vier wedstryde agtereenvolgens te speel, is ’n groot eer en voorreg.
“En om die geleentheid te hê om weer teen hulle te speel, veral by Ellis Park, is baie spesiaal vir my en die hele span, so ek hoop regtig ons kan die beste van Saterdag maak.
“Dit is ’n wonderlike stadion vir ons en dit lê na aan my hart. Wanneer jy daar staan en die volkslied sing en die ondersteuners agter die Springbokke sien, is dit ongelooflik. En natuurlik is die 1995-Rugbywêreldbeker ook daar gewen, so dit is ’n baie spesiale plek vir ons land.”
De Allende se 100ste toets
Die twee het hoog gepraat oor De Allende, wat in die voetspore van sy spanmaats Eben Etzebeth en Siya Kolisi volg, en van ’n handjievol voormalige Bok-legendes wat die eer gehad het om 100 toetswedstryde te speel.
“Vir ’n ou soos Damian de Allende, wat deur die op- en afdraandes saam met ons was en moes klaarkom met baie mense wat gesê het hy is nie goed genoeg om vir die Springbokke te speel nie, is dit ongelooflik,” het Stick gesê.
“In ons kamp het ons nog altyd geweet watter man hy is en watter waarde hy tot die span toevoeg. Hy is een van daardie ouens wat die vuil werk doen sonder dat iemand dit sien, so vir hom om sy 100ste toetswedstryd te speel, is ’n groot prestasie vir hom en sy gesin.
“Hy is nie ’n man van baie woorde nie, maar wanneer hy aanskakel, is hy een van die bestes, so ek is baie trots op hom en ek wil hom en sy gesin gelukwens. Hopelik kan ons dit vir hom spesiaal maak.”
Du Toit, wat Saterdag in sy 99ste toets sal uitdraf, het bygevoeg: “Om Damian sy 100ste toets vir die Springbokke te sien speel, is spesiaal, en dit is ’n ongelooflike eer om langs hom te speel. Ek onthou nog die eerste keer wat ek hom by die Stormers gesien speel het. Hy het op die vleuel gespeel en ek het net hierdie dier gesien in die manier waarop hy die bal gedra het en sy werk op verdediging.
“Ek het soveel respek vir hom, die manier waarop hy hom op en van die veld gedra, en hoe hy as mens gegroei het. Dit is wonderlik om mense in die lewe te sien vorder.”
Respek vir die haka
Du Toit sien daarna uit om weer die haka in die gesig te staar, en het herhaal wat Springbok-afrigter Rassie Erasmus vroeër die week gesê het oor die span se groter begrip van wat dit vir die All Blacks en vir die opposisie beteken.
“Ek sal nooit sê ons sal ontspanne wees nie, maar dit is ’n groot eer om die haka in die gesig te staar,” het Du Toit gesê.
“Net soos Tony (Brown, Bok-assistentafrigter) ons gehelp het om te verstaan waarvoor dit staan, sal elke individuele speler ’n persoonlike betekenis hê van wat dit beteken om daar te staan. Ons sal die haka met respek in die gesig staar en ons sal die uitdaging aanvaar.”
Wat om van die All Blacks te verwag
Stick het gesê oor wat hulle van die All Blacks verwag: “Ons weet Nieu-Seeland gaan dit bring wat intensiteit betref, en ons sal veral in die lynstane en die skrums baie goed moet presteer, want hulle gaan ons daar probeer toets.
“Hulle sal ook met hulle vaardige spelers na gapings soek, so ek sou sê die sleutel is om wakker te bly en nie uitgevang te word nie.”
Die wedstryd skop om 17:10 af en word regstreeks op SuperSport uitgesaai. Beperkte kaartjies is steeds beskikbaar.
*Persverklaring uitgereik deur SA Rugby Kommunikasie.
