LIMPOPO. – ’n Plaashuis se dak by Zoefontein in Tuinplaas is beskadig nadat diewe vermoedelik tussen 18 en 19 Maart toegeslaan en sinkplate van die struktuur verwyder het.
Kol. Malesela Ledwaba sê die eienaar het die plaas die middag van 18 Maart verlaat toe alles nog normaal was, maar met sy terugkeer die volgende oggend het hy ontdek dat die dak oopgebreek en beskadig is. Benewens die skade aan die huis, is verskeie items gesteel, waaronder ’n trapleer, moersleutels, ’n kantoorkabinet en ’n panga. Die totale waarde van die gesteelde goedere en skade word op sowat R195 750 geraam.
Die polisie se ondersoek duur voort. Enigiemand met relevante inligting word gevra om sers. Sello Lekalakala by 082 414 2051 te bel.
