Die DA sê lt.genl. Shadrack Sibiya moet permanent uit die Suid-Afrikaanse Polisiediens verwyder word indien hy skuldig bevind word aan die ernstige aanklagte van verkragting en seksuele voorbereiding wat teen hom ingestel is.
Lisa Schickerling, DA-woordvoerder oor polisie, sê die party verwag dat Sibiya ontslaan sal word indien hy skuldig bevind word. Volgens haar kan die polisie nie geloofwaardig daarop aanspraak maak dat dit vroue en kinders beskerm indien daar nie beslissend opgetree word wanneer ernstige bewerings teen ’n senior polisiebeampte gemaak word nie. Schickerling sê Sibiya is reeds geskors, maar indien hy aan verkragting skuldig bevind word, behoort hy nie in die polisiediens te kan aanbly nie. Sy sê geen rang, titel of invloedryke posisie behoort iemand bo aanspreeklikheid te plaas nie.
Die DA sê strafregtelike aanspreeklikheid moet ook binne die polisie geld en dat Sibiya, indien hy skuldig bevind word, permanent uit die diens verwyder moet word om openbare vertroue in die polisiediens te handhaaf. Die party sê Suid-Afrikaners verdien ’n polisiediens wat slagoffers beskerm, die wet handhaaf en sonder vrees of guns optree.
Sibiya is op 21 September in hegtenis geneem en het op 22 September in die Randburg-landdroshof verskyn op vyf aanklagte, waaronder verkragting, mensehandel en seksuele voorbereiding van ’n kind. Die saak is tot 29 September vir ’n formele borgtogaansoek uitgestel, wat die staat sê hy sal teenstaan. Sibiya is reeds geskors in verband met vorige ondersoeke wat uit die Madlanga-kommissie voortgespruit het.
