VRYSTAAT. – ’n 37-jarige vrou is vroeg Dinsdagoggend by die Jabulani-koshuis in Soweto in hegtenis geneem in verband met die beweerde ontvoering en afpersing van ’n 67-jarige pensioentrekker in Welkom.
Sers. Palesa Thabana, polisiewoordvoerder, sê die provinsiale georganiseerde misdaadeenheid het saam met die taktiese reaksiespanne van Welkom en Zamdela inligting oor die verdagte ondersoek. Sy is omstreeks 05:00 opgespoor en in hegtenis geneem.
Die arrestasie hou verband met ’n voorval op 14 Augustus toe die 67-jarige man na bewering met R55 000 afgepers is nadat hy ontvoer is. Die vrou het glo ’n afspraak met die man gereël oor ’n moontlike werksgeleentheid. Die afspraak was in die parkeerterrein in Potgieterstraat, Dagbreek, Welkom. Kort daarna het twee onbekende mans, wat hulle glo as polisiebeamptes voorgedoen het, die man en die vrou saamgeneem. Die vrou is na bewering buite die Thabong-polisiekantoor afgelaai, waarna die man glo gedwing is om sy bankkaarte te oorhandig en geld uit sy rekening onttrek is. Hy is ook na bewering gedwing om in ’n bank geld na twee afsonderlike bankrekeninge oor te plaas. Hy is later by ’n Engen-vulstasie afgelaai.
’n Saak van ontvoering en afpersing is by die polisie aangemeld en aan die provinsiale georganiseerde misdaadeenheid vir verdere ondersoek toegeken. Die 37-jarige vrou is daarna as ’n persoon van belang geïdentifiseer. Sy sal na verwagting binnekort op aanklagte van ontvoering en afpersing in die Welkom-landdroshof verskyn.
