VRYSTAAT. – ’n 24-jarige man van Makgolokweng naby Harrismith is in hegtenis geneem in verband met die beweerde moord op sy 52-jarige pa, Thomas Amos Mokoena.
Volgens AO Mmako Mophiring, woordvoerder van die Suid-Afrikaanse Polisiediens, is die pa op 30 September na bewering tydens ’n rusie by hul huis met kookwater oor sy bolyf en bene gegooi. Hy het ernstige brandwonde opgedoen.
Mokoena is aanvanklik na ’n plaaslike hospitaal in Harrismith geneem en later na ’n hospitaal in Phuthaditjhaba vir verdere behandeling oorgeplaas. Hy is sowat 15 dae lank in die hospitaal behandel voordat hy aan sy beserings beswyk het.
Die polisie is op 14 Oktober deur hospitaalpersoneel van sy dood in kennis gestel. ’n Moordsaak is daarna geopen, wat tot die inhegtenisneming van die 24-jarige verdagte gelei het.
Die verdagte sal na verwagting binnekort in die Harrismith-landdroshof op ’n aanklag van moord voorkom.
Die saak word deur die Harrismith-speurdiens ondersoek.
Bron: Suid-Afrikaanse Polisiediens (SAPD).
